25. urtemuga ospatzen ari da aurten Aloña Mendiko Gimnasia Erritmiko saila. Hori dela eta, ezohiko erakustaldia egin zuten pasaden larunbat arratsaldean Santa Antzokian. Jose de Azpiazu musika eskolakoekin elkarlanean, koreografia ederrak eskaini zizkietan bertaratu ziren senitarteko eta ikusle guztiei.
Antolatzen dituzten erakustaldi gehienetan gertatzen den bezala, jende ugari bildu zen larunbatean Santa Antzokiara. Jose de Azpiazu musika eskolakoen zuzeneko musika lagun zutela, egun Gimnasia Erritmiko sailean dabiltzen gimnasta nagusienek, hainbat koreografia dantzatu zituzten. Gaztetxoek berriz, astean zehar egindako mural eta pankarta berezi batzuk jarri zituzten aretoan. Era berean, urte guztiotan sailetik pasa diren kide orori eskerrak eman, eta ibilbide luze honetako bideo erreportai bat ere proiektatu zuten aretoan.
Ikasturtea amaitzeko gero eta gutxiago falta den honetan, denboraldi amaierako erakustaldia prestatzen hasiko dira orain saileko gimnasta guztiak. Ikasturtean zehar ikasi dutena herritarrei erakusteko saioa egingo dute ekainean eta saileko arduradunek jakinarazi dutenez, bertan egingo dute zilarrezko ezteiak ospatzeko ekitaldi nagusia.